Hefur einhver annar tekið eftir því að eftir að Republikanar tóku völdin í Bandaríkjunum þá er Newsweek farið að leggja alveg gríðarmikla áherslu á að útskýra reglulega fyrir okkur að vondu kallarnir séu nú ekki einungis vondir á manndrápa- og meiðingamælikvarða heldur líka ofursiðlausir á Bandaríska kúltúrskalanum. Þeir stundi kynlíf með ungum fögrum konum sem þeir eru auðvitað ekki giftir, eyði peningunum sínum í að byggja hallir, séu lágmenningarlega sinnaðir og finnist gaman að leika sér í "asnalegum" leikjum. Þeir drekki of mikið af dýrum vínum og borði of mikið af fínum mat, eyði of miklu í íburð. Af fjögurra blaðsíðna grein Newsweek um leiðtoga Norður Kóreu mætti halda að Bush væri aðallega illa við hann fyrir að hafa kitsch smekk á kvikmyndum og fíla Friday the 13th, Daffy Duck og Elísabetu Taylor. Svipuð grein birtist um syni Saddams fyrir áramót, þó aðeins skárri reyndar minnir mig, en hver veit kannski er hún bara minna vond í minningunni?

Burtséð frá því að það er engum blöðum um það að fletta að ofantaldir ráðamenn eru þjóðum sínum engin gæfa, þá er ég ekki viss um að það sé hægt að setja samhengi milli frammistöðu ráðamanna og slælegs siðferðis hvað einkalíf þeirra varðar. Clinton var t.d held ég fínn forseti þótt hann hafi verið framhjáhaldaradurgur og kvensamur úr hófi fram. Fyrir utan það að ákjósanleg hegðun í einu landi þykir ekki endilega viðeigandi í öðru og öfugt og hæpið að halda að við getum notað okkar eigin mælistiku á öllum breiddargráðum.

Það sem fer mest í taugarnar á mér er hvað svona greinar gefa augljóslega til kynna að ritstjórnarstefnan sé að koma manni á þá skoðun að við eigum að bomba Írak og svoleiðis. Newsweek gengur yfirleitt ágætlega að feika það með því að halda sæmilegu jafnvægi milli ólíkra radda. En það að þeir skuli reglulega birta svona háðsgreinar sviftir algerlega af þeim grímunni.

Sem er ekki endilega slæmt, það er ágætt að fá ritstjórnarstefnu blaða svona á hreint svo maður viti með hvaða gleraugum maður eigi að lesa greinar þess.